דֶער שִׁינָאוֶוער רָב (רַבִּי יְחֶזְקֵאל שְׁרַגֶא הַלְבֶּרְשְׁטַאם זֵכֶר צַדִיק וְקָדוֹשׁ לִבְרָכָה בַּעַל דִּבְרֵי יְחֶזְקֵאל) אִיז אַמָאל גֶעקוּמֶען אִין אַ גֶעוִויסֶע שְׁטָאט אוֹיף שַׁבָּת, אוֹיפְן אַיינְלַאדֶענוּנְג פוּן דִי רָאשֵׁי הַקְּהִלָּה. שׁוֹין וָואכְן פְרִיעֶר הָאט מֶען גֶעטוּהְן צוּגְרֵייטוּנְגֶען אוֹיפְצוּנֶעמֶען דֶעם חָשׁוּב'ן גַאסְט, אִינְאֵיינֶעם מִיט דִי פִילֶע חֲסִידִים פוּן אַלֶע אַרוּמִיגֶע שְׁטֶעט וָואס הָאבְּן גֶּעוָואלְט הָאבְּן דִי זְכִיָּה מִיטְצוּהַאלְטְן דֶעם גֶעהוֹיבֶּענֶעם שַׁבָּת.
דֶער שִׁינָאוֶוער רָב אִיז אָנְגֶעקוּמֶען דָאנֶערְשְׁטִיג אִין יֶענֶע שְׁטָאט. פְרַייטִיג אִינְדֶערְפְרִי רוּפְט זִיךְ אָן דֶער רָב צוּ דִי אַרוּמִיגֶע, אַז עֶר וִויל אַרִיבֶּער פָארְן אוֹיף שַׁבָּת צוּ אַ צְוֵוייטְן דָארְף אִין גֶעגְנְט, אוּן אַזוֹי הָאט עֶר גֶעטוּהְן, עֶר הָאט אִיבֶּערְגֶעלָאזְט דִי שְׁטָאט אוּן גֶעפָארְן צוּ יֶענֶעם דָארְף.
אִינֶעם דָארְף אִיז יֶענֶע שַׁבָּת גֶעוֶוען אַן אוֹיפְרוּף פוּן אַ חָתָן, אוּן וֶוען דֶער חָתָן הָאט עוֹלֶה גֶעוֶוען מַפְטִיר, אוּן גֶעזָאגְט דִי בְּרָכוֹת אוּן הַפְטוֹרָה אִיז דֶער שִׁינָאוֶוער גֶעוֶוען זֵייעֶר צוּקָאכְט, עֶר הָאט גֶעשְׁרִיגְן זֵייעֶר הוֹיעֶךְ דִי הַפְטוֹרָה, אוּן גֶעהַאקְט מִיט דִי פִיס. מֶען הָאט גֶעזֶעהְן אַז עֶר הָאט אַ סְפֶּעצִיעֶלֶע כַּוָּנָה דֶערְבַּיי.
שְׁפֶּעטֶער אִיז אַנְטְפְּלֶעקְט גֶעוָוארְן דִי סִבָּה פוּנֶעם אַוֶועקְפָארְן אוּן פוּן דִי אִינְטְרֶעסַאנְטֶע אוֹיפְפִירוּנְג.
דָאנֶערְשְׁטִיג נַאכְט וֶוען דֶער רָב אִיז נָאךְ גֶעוֶוען אִין דִי גְרוֹיסֶע שְׁטָאט, אִיז גֶעקוּמֶען דֶער טַאטֶע פוּנֶעם חָתָן נֶעמֶען אַ בְּרָכָה פַאר דִי חֲתֻנָּה, אוּן עֶר הָאט זִיךְ אָפְּגֶערֶעדְט פַארְ'ן רָב אַז עֶר צִיטֶערְט זֵייעֶר וִויאַזוֹי דֶער שַׁבָּת וֶועט אַדוֹרְךְ גֵיין, וַוייל אִינֶעם דָארְף וואוּ עֶר וואוֹינְט אִיז דֶער מִנְהָג אַז דֶער חָתָן אִיז עוֹלֶה מַפְטִיר אוּן זָאגְט הוֹיעֶךְ דִי הַפְטוֹרָה, אָבֶּער זַיין זוּן, דֶער חָתָן קֶען נִישְׁט גֶעהֶערִיג קֵיין 'עִבְרֵי' אוּן וֶועט זֵייעֶר פַארְשֶׁעמְט וֶוערְן אַז מֶען וֶועט עֶס בַּאמֶערְקְן. הָאט אֶים דֶער רָב בַּארוּהִיגְט, עֶר זָאל זִיךְ נִישְׁט זָארְגְן אוּן אַלֶעס וֶועט אַרִיבֶּער גֵיין גוּט מִיטְן אוֹיבֶּערְשְׁטְנ'ס הִילְף.
דֶערְפַאר אִיז דֶער רָב סְפֶּעצִיעֶל גֶעפָארְן צוּ יֶענֶעם דָארְף, אוּן גֶעשְׁטַאנֶען שַׁבָּת אִינְדֶערְפְרִי נֶעבְּן בִּימָה, אוּן וֶוען דֶער חָתָן הָאט עוֹלֶה גֶעוֶוען, הָאט עֶר גֶעמַאכְט גֶעוַואלְדִיגֶע קוֹלוֹת אוּן גֶעקְלַאפְּט מִיט דִי הֶענְט אוּן דִי פִיס, כְּדֵי מֶען זָאל נִישְׁט הֶערְן וִויאַזוֹי דֶער חָתָן זָאגְט דִי בְּרָכוֹת אוּן הַפְטוֹרָה, אוּן עֶר זָאל נִישְׁט וֶוערְן פַארְשֶׁעמְט.
