דִי גְמָרָא פַארְצֵיילְט, אַז אִין דִי צַייטְן פוּנֶעם בֵּית הַמִקְדָשׁ פְלֶעגְט מֶען אוֹיסְטֵיילְן יֶעדֶע וָואךְ שַׁבָּת פַאר דִי כֹּהַנִים דִי בְּרוֹיט פוּנֶעם לֶחֶם הפָּנִים.
אֵיינְמָאל זֶענֶען עֶטְלִיכֶע כֹּהַנִים גֶעשְׁטַאנֶען צוּזַאמֶען אוּן גֶעשְׁמוּסט צְוִוישְׁן זִיךְ, יֶעדֶער הָאט פַארְצֵיילְט פַאר זַיין חַבֶר וִויפִיל עֶר הָאט בַּאקוּמֶען פוּנֶעם לֶחֶם הפָּנִים, אֵיין כֹּהֵן הָאט גֶעזָאגְט, אִיךְ הָאבּ בַּאקוּמֶען אַ שְׁטִיקְל וָואס אִיז אַזוֹי גְרוֹיס וִוי אַ בָּאנְדֶעל, הָאט דֶער צְוֵוייטֶער כֹּהֵן זִיךְ אָנְגֶערוּפְן, אִיז הָאבּ בַּאקוּמֶען אַ שְׁטִיקְל וָואס אִיז אַזוֹי גְרוֹיס וִוי אַ כְּזַיִת, דֶער דְרִיטֶער כֹּהֵן הָאט זִיךְ אָנְגֶערוּפְן, נִישְׁט קֵיין שֵׁיינֶע זַאךְ, עֶר הָאט גֶעזָאגְט, מֵיין שְׁטִיקְל פוּן דִי לֶחֶם הפָּנִים אִיז גֶעוֶוען אַזוֹי גְרוֹיס וִוי דִי וֵויידְל פוּן אַ מֵייז…
וֶוען דִי חֲכָמִים הָאבְּן דָאס גֶעהֶערְט, אַז דֶער כֹּהֵן נִיצְט אַ נִישְׁט שֵׁיינֶע שְׁפְּרַאךְ, הָאבְּן זֵיי פַארְשְׁטַאנֶען אַז עֶר אִיז זִיכֶער נִישְׁט קֵיין עֶהרְלִיכֶער כֹּהֵן, הָאבְּן זֵיי אֶים נָאכְגֶעקוּקְט, אוּן זֵיי הָאבְּן גֶעזֶעהן אַז עֶר טָאר טַאקֶע נִישְׁט אַרְבֶּעטְן מֶער אִין בֵּית הַמִקְדָשׁ.
פוּן דִי מַעֲשֶׂה קֶען מֶען זֶעהן וִוי שְׁטַארְק מֶען דַארְף אַכְטוּנְג גֶעבְּן צוּ נוּצְן אַלֶעמָאל אַן אֵיידֶעלֶע שְׁפְּרַאךְ. וֶוען אַ מֶענְטְשׁ וִויל עֶפֶּעס זָאגְן דַארְף עֶר טְרַאכְטְן פַארְדֶעם וִוי אַזוֹי צוּ זָאגְן, כְּדֵי אַז זַיין רֶעדְן זָאל זַיין מִיט דֶרֶךְ אֶרֶץ.
אוֹיךְ זֶעהט מֶען פוּן דִי מַעֲשֶׂה אַז אוֹיבּ אַ מֶענְטְשׁ רֶעדְט נִישְׁט אֵיידְל, מִיט דֶרֶךְ אֶרֶץ, דֶעמָאלְטְס אִיז אַ סִימָן אַז עֶר אִיז נִישְׁט קֵיין עֶהרְלִיכֶער מֶענְטְשׁ.
