אֵלִיָּהוּ הַנָּבִיא אִיז אַמָאל גֶעגַאנְגֶען אִין וֶועג אוּן עֶר הָאט גֶעטְרָאפְן אַ אִיד, הָאט עֶר זִיךְ אָפְּגֶעשְׁטֶעלְט אוּן אָנְגֶעהוֹיבְּן צוּ שְׁמוּעְסְן מִיט אֶים, דֶער אִיד אִיז לַיידֶער נִישְׁט גֶעוֶוען אַ אֵיידֶעלֶער אִיד, עֶר הָאט נִישְׁט גֶעלֶערְנְט תּוֹרָה אוּן הָאט נִישְׁט גֶעהַאט גוּטֶע מִדּוֹת, עֶר הָאט נִישְׁט גֶעוואוּסְט אַז עֶר רֶעדְט מִיט אֵלִיָּהוּ הַנָּבִיא אוּן עֶר הָאט זִיךְ גֶענוּמֶען אָפְּלַאכְן פוּן אֶים אוּן חוֹזֶק מַאכְן, הָאט אֵלִיָּהוּ אֶים גֶעפְרֶעגְט: פַארְוָואס פִירְסְטוּ זִיךְ אוֹיף אַזוֹי, וָואס וֶועסְטוּ עֶנְטְפֶערְן פַאר דֶעם אוֹיבֶּערְשְׁטְן וֶוען מֶען וֶועט דִיךְ מִשְׁפֶּטְ'ן אוֹיף יֶענֶע וֶועלְט?!
דֶער אִיד אִיז גֶעוָוארְן עֶרְנְסְט אוּן אָנְגֶעהוֹיבְּן אַרַיינְטְרַאכְטְן אוּן עֶר הָאט גֶעעֶנְטְפֶערְט: וָואס זָאל אִיךְ טוּהְן אַז אִיךְ בִּין גֶעבּוֹירְן גֶעוָוארְן מִיט אַ לֵיידִיגֶע קָאפּ אָן שֵׂכֶל אוּן אִיךְ קֶען נִישְׁט לֶערְנֶען דִי הֵיילִיגֶע תּוֹרָה, אוּן אוֹיבּ מֶען לֶערְנְט נִישְׁט קֵיין תּוֹרָה וֶוערְט מֶען חָלִילָה פַארְגְרֶעבְּט.
הָאט אֶים אֵלִיָּהוּ הַנָּבִיא גֶעפְרֶעגְט: 'וָואס אִיז דַיין אַרְבֶּעט?' הָאט עֶר גֶעעֶנְטְפֶערְט: 'אִיךְ בִּין אַ פִישֶׁער, אִיךְ פַאנְג פִישׁ.' 'אוּן וִוי אַזוֹי כַאפְּסְטוּ פִישׁ' הָאט אֵלִיָּהוּ גֶעפְרֶעגְט? 'מִיט אַ נֶעץ' הָאט עֶר גֶעעֶנְטְפֶערְט, 'אוּן וִוי אַזוֹי מַאכְסְטוּ דִי נֶעץ?' 'אִיךְ נֶעם פְלַאקְס אוּן אִיךְ מַאךְ דֶערְפוּן שְׁטְרִיק דֶערְנָאךְ פְלֶעכְט אִיךְ פוּן דֶעם אַ נֶעץ אוּן פוּן אוּנְטְן בִּינְד אִיךְ צוּ שְׁטֵיינֶער אַז עֶס זָאל אַרָאפְּנִידֶערְן אִין דִי וַואסֶער אוּן פוּן אוֹיבְּן בִּינְד אִיךְ צוּ הֶעלְצְלֶעךְ אַז דִי נֶעץ זָאל שְׁוִוימֶען אוֹיפְן וַואסֶער, נָאכְדֶעם וַוארְף אִיךְ אַרַיין דִי נֶעץ אִין וַואסֶער אוּן עֶס כַאפְּן זִיךְ אַרַיין פִישׁ, דֶערְנָאךְ צִי אִיךְ אַרוֹיס דִי נֶעץ אוּן אִיךְ נֶעם דִי פִישׁ צוּם מַארְק צוּ פַארְקוֹיפְן'. הָאט אֶים אֵלִיָּהוּ וַוייטֶער גֶעפְרֶעגְט: 'אוּן פוּן וואוּ הָאסְטוּ זִיךְ אוֹיסְגֶעלֶערְנְט צוּ מַאכְן אַ נֶעץ אוּן כַאפְּן פִישׁ?' 'אַזוֹיפִיל שֵׂכֶל הָאט מִיר נָאךְ דֶער אוֹיבֶּערְשְׁטֶער גֶעגֶעבְּן' הָאט דֶער פִישֶׁער גֶעעֶנְטְפֶערְט.
הָאט אֵלִיָּהוּ הַנָּבִיא אֶים גֶעזָאגְט: 'קוּק אַהעֶר, צוּ מַאכְן אַ נֶעץ הָאט דִּיר דֶער אוֹיבֶּערְשְׁטֶער גֶעגֶעבְּן שֵׂכֶל מֵיינְסְטוּ אַז דֶער אוֹיבֶּערְשְׁטֶער הָאט דִּיר נִישְׁט גֶעגֶעבְּן שֵׂכֶל צוּ לֶערְנֶען תּוֹרָה?! דֶער אוֹיבֶּערְשְׁטֶער הָאט גֶעהֵייסְן אַ יֶעדֶער אִיד לֶערְנֶען תּוֹרָה, עֶס קֶען נִישְׁט זַיין אַז דֶער אוֹיבֶּערְשְׁטֶער הֵייסְט לֶערְנֶען תּוֹרָה אוּן עֶר גֶעבְּט נִישְׁט קֵיין שֵׂכֶל צוּ לֶערְנֶען תּוֹרָה, דֶער אֱמֶת אִיז אַז יֶעדֶער אִיד הָאט שֵׂכֶל צוּ לֶערְנֶען תּוֹרָה אוּן יֶעדֶער אִיד מוּז לֶערְנֶען תּוֹרָה לוֹיט זַיין מֶעגְלִיכְקַייט'.
דֶער אִיד הָאט זִיךְ גֶענוּמֶען וֵויינֶען אוּן אֵלִיָּהוּ הַנָּבִיא הָאט אֶים בַּארוּאִיגְט: אַסַאךְ מֶענְטְשְׁן מַאכְן דֶעם טָעוּת אוּן זָאגְן אַז זֵיי הָאבְּן נִישְׁט קֵיין שֵׂכֶל צוּ לֶערְנֶען תּוֹרָה אָבֶּער פַאר אַנְדֶערֶע זַאכְן הָאבְּן זֵיי יָא שֵׂכֶל אָבֶּער דֶער אֱמֶת אִיז אַז יֶעדֶער אִיד הָאט שֵׂכֶל פַאר לֶערְנֶען עֶס אִיז קֵיינְמָאל נִישְׁט צוּ שְׁפֶּעט הֵייבּ אָן צוּ לֶערְנֶען תּוֹרָה אוּן לֶערְן יֶעדְן טָאג וֶועסְטוּ זֶעהְן אַז דוּ הָאסְט שֵׂכֶל אוּן דוּ קֶענְסְט לֶערְנֶען תּוֹרָה.
יישר כח מיין זון האָט הנאה געהאט פון די מעשה