דֶער הֵיילִיגֶער צַדִיק ר' אַרְי' לֵייבּ פוּן שְׁפָּאלֶע אִיז גֶעוֶוען בַּאקַאנְט אִיבֶּערָאל אַלְץ דֶער שְׁפָּאלֶער זֵיידֶע. מֶען רוּפְט אִים אַזוֹי וַוייל בַּיי זַיין בְּרִית הָאט דֶער הֵיילִיגֶער בַּעַל שֵׁם טוֹב אִיהְם גֶעבֶּענְטְשְׁט אַז עֶר וֶועט זוֹכֶה זַיין צוּ זַיין דֶער זֵיידֶע פוּן כְּלַל יִשְׂרָאֵל, עֶר אִיז גֶעוֶוען אֵיינֶער פוּן דִי גֶעהוֹיבֶּענֶע תַּלְמִידִים פוּן הֵיילִיגְן בַּעַל שֵׁם טוֹב זי"ע זַיין יָארְצַייט אִיז
ו' תִּשְׁרֵי.
דֶער שְׁפָּאלֶער זֵיידֶע זצ"ל פְלֶעגְט אַלֶעמָאל פֶּסַח בַּיים סֵדֶר צוּזַאמְנֶעמֶען דִי וֵויין וָואס מֶען הָאט אַרָאפְּגֶעגָאסְן בַּיים זָאגְן דִי מַכּוֹת, וַוייל עֶר הָאט זִיךְ גֶעזָארְגְט אַז עֶס זָאל נִישְׁט צוּקוּמֶען צוּ קֵיין סַכָּנָה, עֶר פְלֶעגְט דָאס גְלַייךְ אוֹיסְגִיסְן אַז קֵיינֶער זָאל דָאס נִישְׁט אָנְרִירְן.
אֵיינְמָאל פֶּסַח בַּיינַאכְט הָאט דֶער שְׁפָּאלֶער זֵיידֶע צַאמְגֶענוּמֶען דִי וֵויין אוּן עֶס אַרַיינְגֶעגָאסְן אִין אַ קְלֵיין פְלֶעשְׁל, יֶעדֶער הָאט זִיךְ זֵייעֶר גֶעוואוּנְדֶערְט פַארְוָואס דֶער צַדִיק לֵייגְט אַוֶועק דִי וֵויין "צוּ וָואס דַארְף דֶער צַדִיק הָאבְּן דִי וֵויין?
חוֹל הַמוֹעֵד אִיז אֵיינֶער פוּן דִי גְרוֹיסֶע חֲסִידִים פוּנֶעם שְׁפָּאלֶער זֵיידֶע, אַ רַייכֶער אִיד מִיטְן נָאמֶען ר' וָואלְף, גֶעקוּמֶען צוּם רֶבִּין, דֶער ר' וָואלְף אִיז גֶעוֶוען אַ גוּט הַארְצִיגֶער מֶענְטְשׁ, אַ גְרוֹיסֶער בַּעַל צְדָקָה, אוּן עֶר פְלֶעגְט טוּהְן אַסַאךְ חֶסֶד פַאר מֶענְטְשְׁן.
וִוי נָאר עֶר אִיז אַרַיינְגֶעקוּמֶען צוּם צַדִיק הָאט זִיךְ דֶער שְׁפָּאלֶער זֵיידֶע אָנְגֶערוּפְן צוּ אִים, "ר' וָואלְף, אִיךְ הָאבּ פַאר אַייךְ אַ מַתָּנָה", אוּן דֶער צַדִיק הָאט אִים גֶעגֶעבְּן דִי פְלֶעשְׁל וֵויין, פוּן דִי מַכּוֹת, ר' וָואלְף הָאט זִיךְ זֵייעֶר דֶערְשְׁרָאקְן אוּן עֶר הָאט גֶעטְרַאכְט "וֶוער וֵוייסְט וָואס עֶס וֶועט פַּאסִירְן מִיט מִיר אַז דֶער הֵיילִיגֶער צַדִיק גִיט מִיר דִי וֵויין", דֶער הֵיילִיגֶער צַדִיק הָאט בַּאמֶערְקְט אַז ר' וָואלְף אִיז זֵייעֶר דֶערְשְׁרָאקְן, הָאט אִים דֶער צַדִיק גֶעזָאגְט, דַארְפְסְט גָארְנִישְׁט מוֹרָא הָאבְּן, וֶוען דוּ פָארְסְט אַהֵיים זָאלְסְטוּ מִיט נֶעמֶען דִי וֵויין אוּן עֶס גוּט בַּאהַאלְטְן, צְוִוישְׁן דַיינֶע טַייעֶרֶע זַאכְן, אוּן דוּרְךְ דִי וֵויין וֶועסְטוּ אי"ה גֶעהָאלְפְן וֶוערְן.
וֶוען ר' וָואלְף אִיז אַהֵיים גֶעפָארְן הָאט עֶר אַזוֹי גֶעטוּהְן, אוּן עֶר הָאט אַוֶועק גֶעלֵייגְט דִי וֵויין צְוִוישְׁן זַיינֶע טַייעֶרֶע זַאכְן אוּן עֶר הָאט דָאס גוּט פַארְשְׁלָאסְן.
דֶער ר' וָואלְף הָאט גֶעוואוֹינְט אִין אַ פַארְשְׁטוּפְּטֶע דָארְף, זֵייעֶר וֵויינִיג מֶענְטְשְׁן פְלֶעגְן אַדוּרְך פָארְן דֶעם דָארְף, אִינְמִיטְן וִוינְטֶער וֶוען עֶס אִיז גֶעוֶוען זֵייעֶר קַאלְט אוּן עֶס פְלֶעגְט פַאלְן אַ גְרוֹיסֶער שְׁנֵיי, אִיז כִּמְעַט קֵיינֶער נִישְׁט אַדוּרְךְ גֶעפָארְן דֶעם דָארְף, אוֹיבּ עֶס הָאט זִיךְ גֶעמַאכְט אַז אֵיינֶער אַ אִיד אָדֶער אֲפִילוּ לְהַבְדִיל אַ גוֹי אִיז אַדוּרְךְ גֶעפָארְן דֶעם דָארְף אִיז גֶעוֶוען דֶער סֵדֶר אַז זֵיי זֶענֶען אַרַיין גֶעקוּמֶען צוּ ר' וָואלְף אוּן עֶר פְלֶעגְט זֵיי אוֹיפְנֶעמֶען שֵׁיין אוּן גֶעבְּן צוּ עֶסְן אוּן צוּ טְרִינְקְן אַז זֵיי זָאלְן זִיךְ קֶענֶען אָנְוַוארֶעמֶען פוּן דִי גְרוֹיסֶע קֶעלְט.
אֵיין נַאכְט אִינְמִיטְן וִוינְטֶער וֶוען אִינְדְרוֹיסְן אִיז גֶעפַאלְן אַ גְרוֹיסֶער שְׁנֵיי, אוּן עֶס הָאט גֶעבְּלָאזְן זֵייעֶר אַ שְׁטַארְקֶע וִוינְט, הֶערְט ר' וָואלְף קְלַאפְּן אוֹיף דֶער טִיר, ר' וָואלְף הָאט זִיךְ אוֹיפְגֶעכַאפְּט אוּן עֶר הָאט זֵייעֶר גֶעוואוּנְדֶערְט, וֶוער קֶען יֶעצְט אִין אַזַא פְרָאסְט, זַיין אוּנְטֶערְוֶועגֶענְס, אוּן עֶר הָאט, אַזוֹי וִוי זַיין סֵדֶר אִיז גֶעוֶוען, אוֹיפְגֶעמַאכְט דִי טִיר, אוּן עֶר הָאט גֶעזֶעהְן פַאר זִיךְ דְרַיי פּוֹיעֶרְן, זֵיי הָאבְּן זִיךְ גֶעבֶּעטְן בַּיי ר' וָואלְף אַז עֶר זָאל זֵיי אַרַיין לָאזְן זֵיי זָאלְן זִיךְ קֶענֶען אַבִּיסְל אָנְוַוארֶעמֶען, אוּן אָפְּרוּהֶען פוּן דִי שְׁוֶוערֶע קֶעלְט, ר' וָואלְף הָאט זֵיי מְקַרֵב גֶעוֶוען אוּן זֵיי הָאבְּן זִיךְ פֵיין אָנְגֶעוַוארֶעמְט.
אַזוֹי וִוי זֵיי הָאבְּן זִיךְ אַבִּיסְל אָנְגֶעוַוארֶעמְט, הָאבְּן זֵיי גֶעזָאגְט פַאר ר' וָואלְף, זָאלְסְטוּ וִויסְן אַז מִיר זֶענֶען בִּכְלַל נִישְׁט גֶעקוּמֶען דָא זִיךְ אָנְוַוארֶעמֶען, מִיר זֶענֶען דִיך גֶעקוּמֶען בַּא'גַנְבֶ'ענֶען, מִיר וֵוייסְן אַז יֶעצְט אִין דִי גְרוֹיסֶע קֶעלְט דְרֵייעֶן זִיךְ נִישְׁט אַרוּם מֶענְטְשְׁן אוֹיף דִי גַאס אוּן קֵיינֶער וֶועט נִישְׁט בַּאמֶערְקְן וָואס מִיר טוּעֶן, וֶועגְן דֶעם קֶענֶען מִיר דִיך יֶעצְט גוּט בַּא'גַנְבֶ'ענֶען, אוּן זֵיי הָאבְּן גֶעשְׁטֶעלְט ר' וָואלְף צוּ דֶער וַואנְט, אוּן זֵיי הָאבְּן גֶע'עֶפְנְט יֶעדְן לֶעדְל אוּן יֶעדְן שַׁאנְק אוּן אַלֶע טַייעֶרֶע זַאכְן וָואס זֵיי הָאבְּן גֶעטְרָאפְן הָאבְּן זֵיי אַרַיינְגֶעלֵייגְט אִין אַ גְרוֹיסֶער זַאק, פְּלוּצְלִינְג הָאבְּן זֵיי בַּאמֶערְקְט אִין אַ שַׁאנְק דִי וֵויין וָואס דֶער שְׁפָּאלֶער זֵיידֶע הָאט גֶעגֶעבְּן פַאר ר' וָואלְף, הָאבְּן דִי פּוֹיעֶרְן גֶעטְרַאכְט, דָאס מוּז זִיכֶער זַיין אַ גָאר טַייעֶרֶע אוּן גֶעשְׁמַאקֶע וֵויין, אַז עֶס לִיגְט דָא אַזוֹי אַיינְגֶעשְׁפַּארְט צְוִוישְׁן אַלֶע טַייעֶרֶע זַאכְן" אוּן דִי פּוֹיעֶרְן הָאבְּן אוֹיס גֶעטְרִינְקְן דִי גַאנְצֶע וֵויין, אוּן זֵיי זֶענֶען אַרָאפְּגֶעפַאלְן אִין אַ טִיפֶע שְׁלָאף.
וֶוען ר' וָואלְף הָאט גֶעזֶעהְן אַז זֵיי שְׁלָאפְן אַזוֹי טִיף אִיז עֶר שְׁנֶעל אַרוֹיסְגֶעלָאפְן רוּפְן דִי פָּאלִיצֵיי, דִי פָּאלִיצֵיי זֶענֶען גְלַייך גֶעקוּמֶען אוּן גֶעזֶעהְן דִי דְרֵיי פּוֹיעֶרְן שְׁלָאפְן אוֹיף דֶער עֶרְד, אוּן דִי זַאק פוּל מִיט דִי טַייעֶרֶע זַאכְן וָואס זֵיי הָאבְּן גֶעוָואלְט גַנְבֶ'ענֶען, דִי פָּאלִיצֵיי הָאבְּן זֵיי גֶעבּוּנְדְן אִין קֵייטְן אוּן אַרֶעסְטִירְט.
יֶעצְט הָאט ר' וָואלְף פַארְשְׁטַאנֶען וָואס דֶער הֵיילִיגֶער צַדִיק דֶער שְׁפָּאלֶער זֵיידֶע הָאט גֶעמֵיינְט וֶוען עֶר הָאט גֶעזָאגְט אַז דוּרְךְ דִי וֵויין וֶועסְטוּ אי"ה גֶעהָאלְפְן וֶוערְן, זי"ע.