אִין דִי צַייט וָואס דֶער רוֹימִישֶׁע קֶענִיג הָאט גֶעוֶועלְטִיגְט אוֹיף אֶרֶץ יִשְׂרָאֵל הָאט עֶר אַרוֹיסְגֶעגֶעבְּן שְׁלֶעכְטֶע גְזֵירוֹת אוֹיף דִי אִידְן, אֵיינְמָאל הָאט עֶר אַרוֹיסְגֶעגֶעבְּן אַ גְזֵירָה אַז קֵיינֶער טָאר נִישְׁט לֶערְנֶען קֵיין תּוֹרָה אוּן וֶועם מֶען וֶועט כַאפְּן לֶערְנֶען וֶועט מֶען אִים הַרְגֶענֶען, אָבֶּער דֶער הֵיילִיגֶער תַּנָא רַבִּי עֲקִיבָא הָאט זִיךְ מוֹסֵר נֶפֶשׁ גֶעוֶוען אוּן וַוייטֶער גֶעלֶערְנְט מִיט זַיינֶע תַּלְמִידִים בַּאהַאלְטֶענֶערְהֵייט.
אֵיינְמָאל אִיז אַרַיינְגֶעקוּמֶען אַ אִיד מִיטְן נָאמֶען פַּפוּס בֶּן יְהוּדָא אוּן עֶר הָאט גֶעזֶעהְן וִוי רַבִּי עֲקִיבָא לֶערְנְט מִיט זַיינֶע תַּלְמִידִים אַזוֹי גֶעשְׁמַאק הָאט פַּפוּס גֶעפְרֶעגְט פוּן רַבִּי עֲקִיבָא: וִוי אַזוֹי הָאסְטוּ נִישְׁט מוֹרָא פוּן דִי רוֹימִישֶׁע פָּאלִיצֵיי זֵיי קֶענֶען דִיך דָאך הַרְגֶענֶען, הָאט רַבִּי עֲקִיבָא גֶעעֶנְטְפֶערְט מִיט אַ מָשָׁל: אֵיינְמָאל הָאט זִיךְ אַ פוּקְס גֶעשְׁטֶעלְט נֶעבְּן דִי וַואסֶער אוּן עֶר הָאט גֶעפְרֶעגְט פוּן דִי פִישׁ: פַארְוָואס זֶענְט עֶטְץ נִישְׁט רוּאִיג אוּן עֶטְץ לוֹיפְטְס אַהֶער אוּן אַהִין אַ גַאנְצֶע צַייט? הָאבְּן דִי פִישׁ גֶעעֶנְטְפֶערְט: וֵוייל דִי נֶעצֶען וִוילְן אוּנְז כַאפְּן, זָאגְט דֶער פוּקְס: קוּמְטְס מִיט מִיר, אִיךְ הָאבּ אַ גוּטֶע פְּלַאץ וִוי עֶטְץ דַארְפְט'ס נִישְׁט מוֹרָא הָאבְּן פוּן קֵיין נֶעצְן, הָאבְּן דִי פִישׁ גֶעעֶנְטְפֶערְט: דוּ בִּיסְט דֶער פוּקְס וָואס אִיז דִי קְלוּגְסְטֶע פוּן אַלֶע חַיוֹת? דִי פַארְשְׁטֵייסְט נִישְׁט אַז אוֹיבּ מִיר גֵייעֶן אַרוֹיס פוּן וַואסֶער שְׁטַארְבְּן אוּנְז אַלֶע אָפּ, אַזוֹי אוֹיךְ אַ אִיד אָן תּוֹרָה אִיז אַזוֹי וִוי טוֹיט.
אַזוֹי הָאט רַבִּי עֲקִיבָא וַוייטֶער גֶעלֶערְנְט בִּיז אֵיין טָאג הָאט מֶען אִים גֶעכַאפְּט לֶערְנֶען אוּן מֶען הָאט אִים אַרֶעסְטִירְט אָבֶּער אֲפִילוּ אִין תְּפִיסָה הָאט עֶר נִישְׁט אוֹיפְגֶעהֶערְט צוּ לֶערְנֶען.
אֵיין טָאג הָאט זִיךְ דִי טִיר פוּן תְּפִיסָה אוֹיפְגֶעמַאכְט אוּן מֶען הָאט אַרַיינְגֶעבְּרֶענְגְט פַּפּוּס בֶּן יְהוּדָא אִין תְּפִיסָה, הָאט פַּפּוּס גֶעזָאגְט פַאר רַבִּי עֲקִיבָא: רַבִּי, וואוֹיל אִיז דַיין חֵלֶק אַז מֶען הָאט דִיךְ אַיינְגֶעשְׁפַּארְט דָא וֶועגְן דוּ הָאסְט גֶעלֶערְנְט תּוֹרָה, אוּן מִיךְ הָאט אַיינְגֶעשְׁפַּארְט פַאר מַיינֶע שְׁלֶעכְטֶע מַעֲשִׂים.
